சட்டம் இப்படித்தான் பேசும்!!!

சமீபத்தில் டில்லி உயர்நீதிமன்றம் வழங்கிய ஒரு தீர்ப்பு குறித்து சில பதிவுகளையும் ஆக்ரோஷமான எதிர்வினைகளையும் படிக்க நேர்ந்தது. அந்த பதிவை எழுதியவர்களும் பின்னூட்டமிட்டவர்களும் தீர்ப்பை குறை சொல்லியிருந்தார்கள்.

சரி அப்படி என்ன தான் வழக்கு? என்ன தான் தீர்ப்பு? என்று ஆராய்ந்ததில் பெண் வீட்டாரின் வக்கீல் தலையில் ஆர்டர் ஆர்டர் ஆர்டர் என்று மூன்று முறை குட்டவேண்டும் போல் இருந்தது. ஆண் வீட்டாரின் வக்கீலுக்கு ஒரு சபாஷ் போடலாம்.

உண்மையில் இந்த தீர்ப்பு மிகவும் நுட்பமானது.

காலம் காலமாய் வரதட்சணை வழக்குகளில் நாம் மாப்பிள்ளை வீட்டார் தண்டிக்கப்படுவதை மட்டுமே பார்த்து பழகிப்போனதால் ஒரு பெண் மீது வழக்கு பதியப்பட்டு விசாரணைக்கு வருகிற பொழுது அது ஆச்சரியமாகவும் அபத்தமாகவும் இருக்கிறது. வரதட்சணை கேஸ் என்றாலே மாப்பிள்ளை வீட்டார் மீது தானே வழக்கு பதிய வேண்டும் எதற்கு பெண் மீது வழக்கு போடுகிறார்கள் என்று பெரிய அளவில் கொதித்துப்போகிறோம். அப்படி கொதிப்பதற்கு அவசியமே இல்லாமல் இந்த தீர்ப்பு பெண்ணுக்கு சாதகமாகவே வழங்கப்பட்டது என்பது தான் உண்மை.

வரதட்சணை கொடுப்பதும் வாங்குவதும் குற்றம். லஞ்சம் கொடுப்பதும் வாங்குவதும் குற்றம். ஆனால் பெரும்பாலும் லஞ்சம் வாங்கியவரையே தண்டித்து சிறையில் அடைப்பதை பார்த்துவிட்ட நமக்கு முதல் முறையாக லஞ்சம் கொடுத்ததற்காக ஒருவர் மீது வழக்கு பதிவு செய்யப்படும் போது வியப்பாக இருக்கிறது.

நான் செய்திகளில் படித்தவரை.

பெண் காவல் நிலையத்தில் ஒரு புகார் கொடுக்கிறாள். அதிலே "திருமணத்திற்கு முன்பு இவ்வளவு வரதட்சணை கொடுத்தோம். அது போதாமல் இன்னும் இன்னும் வேண்டும் என்று என்னை கொடுமை படுத்துகிறார்கள். எனவே மாப்பிள்ளை வீட்டாரை வரதட்சணை கேட்டு துன்புறுத்தியதாக கைது செய்ய வேண்டும்" என்று முறையிடுகிறார்.

இப்போது தான் நீங்கள் ஆண் வீட்டாரின் வக்கீலுடைய சட்ட புத்தி சாதுர்யத்தை கவனிக்க வேண்டும். மணமகள் கொடுத்த புகாரிலும் தொடர்ந்து அளித்த வாக்குமூலத்திலும் தான் வரதட்சணை கொடுத்ததாக ஒப்புக்கொண்டிருக்கிறார். வரதட்சணை கொடுப்பதும் வாங்குவதும் தவறு. எனவே வரதட்சணை கொடுத்த குற்றத்திற்காக பெண் மீது எப்.ஐ.ஆர் பதிவு செய்ய உத்தரவிட்ட நீதிமன்றம் ஆர்டரோடு வருகிறார். வழக்கு பதிவு செய்யப்படுகிறது.

பிறகு அந்த வழக்கிலிருந்து தன்னை விடுவிக்கும்படி பெண் மேல் முறையீடு செய்கிறாள்.

அந்த மேல் முறையீட்டை விசாரித்த நீதிமன்றம் "பெண் , தான் கொடுத்த புகாரில் வரதட்சணை கொடுத்ததாக தெரிவித்திருக்கிறார். இருந்தபோதும் பாதிக்கப்பட்ட ஒருவருடைய வாக்குமூலத்தை வைத்து அதை அவருக்கு எதிராக திருப்பி அவரையே குற்றம் சாட்ட முடியாது" என்று தெரிவிக்கிறது.

அதே போல் "வரதட்சணை கொடுக்கவில்லை என்றால் திருமணத்தை நடத்தவிடமாட்டோம் என்ற மாப்பிள்ளை வீட்டாரின் மிரட்டலுக்கு பயந்து வரதட்சணை கொடுத்திருக்கிறார்கள். எனவே அந்த பெண்ணை நாம் சூழ்நிலை கைதியாகவே பார்க்கவேண்டும். அவர் மீது குற்றம் சுமத்தி வழக்கு பதிய முடியாது. எனவே இவ்வழக்கை தள்ளுபடி செய்கிறேன்." என்று தீர்ப்பளித்திருக்கிறார்.

இந்த வழக்கில் முழுக்க முழுக்க பெண்ணுக்கு சாதகமாகவே தீர்ப்பு வழங்கப்பட்டிருக்கிறது.

எத்தனை அழகாய் இருக்கிறது பாருங்கள் இந்த சட்டம்.

"வரதட்சணை கொடுப்பதும் தவறு. வாங்குவதும் தவறு".

இந்த சட்டத்தின் சிறப்பம்சம் வரதட்சணை வாங்குவதை எளிதாக நிரூபிக்க முடியும் என்பதே. அதே சமயம் வரதட்சணை கொடுக்க முயல்கிறார்கள் என்று மாப்பிள்ளை வீட்டார் நிரூபிப்பது சாத்தியமல்ல. இது முழுக்க முழுக்க பெண்களுக்கு சாதகமான ஒரு சட்டம். இது அவசியமா இல்லையா என்பது குறித்து நான் இங்கே கருத்து சொல்ல விரும்பவில்லை. ஆனால் இச்சட்டம் முழுக்க முழுக்க பெண்களுக்கு ஆதரவானது என்பது மறுப்பதற்கில்லை.அந்த ஆதரவின் தொடர்ச்சியாகத்தான் இந்த தீர்ப்பும் வழங்கப்பட்டிருக்கிறது. எனவே இத்தீர்ப்பின் மூலம் நீதிமன்றம் இரட்டை வேடம் போடுகிறதென்றோ அல்லது "மிரட்டலின் பேரில் தவறு செய்தால் அது தவறு இல்லையா? " என்பது போன்ற அதிபயங்கர கேள்விகளை தொடுப்பதும் குற்றம்சாட்டுவதும் அவசியமற்றது.

இதுவரை இந்தியாவில் மாப்பிள்ளை வீட்டார் யாராவது பெண் வீட்டார் மீது வரதட்சணை கொடுத்ததாக வழக்கு போட்டு நிரூபித்தார்களா. விஞ்ஞான பூர்வமாக நிரூபித்தால் தான் உண்டு. சாட்சிபூர்வமாக ஆதாரபூர்வமாக பிச்...ரொம்ப கஷ்டமப்பா.

சட்டம் இப்படித்தான் பேசும்.